"DON GIOVANNI", da compañía da ESAD-VIGO L'INDIGNATI. UNHA MOI DIVERTIDA E DIDÁCTICA REPRESENTACIÓN TEATRAL

Co gallo da conmemoración do DÍA DAS LETRAS GALEGAS, a Biblioteca e mais a Comisión de Normalización Lingüística organizaron o pasado luns 18 de maio a representación teatral escenificada por un dos grupos teatrais da Escola Superior de Arte Dramática de Galicia (ESAD-Vigo).

A compañía de L'INDIGNATI, formada por alumnado de 3º de Interpretación da ESAD de Vigo, dirixida polo seu profesor NANDO LLERA, fixo as delicias do público (2º ciclo da ESO e Bacharelato) representando unha parodia do mito do DON JUAN dentro da estrutura da COMMEDIA DELL'ARTE. Unha excelente interpretación que nos fala da recoñecida calidade da ESAD de Vigo.

Rimos a esgalla porque os gags eran constantes, moi ben metidos, con referencias á actualidade. A maiores, adentrámonos por unha banda no particular xénero teatral da Commedia dell'Arte e pola outra no argumento do mito do Don Juan.

Non foi menos interesante o coloquio final, as espelidas preguntas do noso alumnado e a valiosa información que nos achegaron actores, actrices e director acerca dos estudos de arte dramática na súa escola.